蘋果教主喬布斯騎鶴歸西，全球蘋果粉絲都唔捨得佢，其中一位粉絲就係土豆網CEO王微。原來王微年幾前同喬布斯碰過面，仲俾喬布斯兜口兜面話佢撻嘢。
話說，年幾前王微透過硅谷一位朋友安排，去到喬布斯office晉見教主。王微簡單介紹土頭網係乜，點知喬布斯亦簡單歸納，「這是偷！」王微惟有解釋，「我們只是提供分享的平台。」換嚟教主更正，「幫助用戶偷！」
雖然對住神級偶像，但句句俾人話你係賊，真係火都嚟。王微喺blog度話，iPod可以播MP3，咪一樣俾人鬧幫用戶盜版音樂。iPhone手機上面視頻apps軟件用嘅Youtube，同土豆網模式都差唔多啫。佢企圖再為土豆辯護，但喬布斯毫不留情炮轟「偷就是偷」！
土豆網係類似Youtube嘅影片分享網站，今年成功喺美國上市，但過去又真係牽涉好多版權糾紛，好似曾經因為網民上載熱門影片《瘋狂的石頭》，08年俾法院判罰咗5萬蚊人仔。
見完教主瞓唔着
王微似乎對教主嘅批評耿耿於懷，喺blog度話，見完教主瞓唔着。畢竟，人都去咗，王微話喺教主身上學咗唔少嘢，好似要不顧一切去追求，例如當土豆面對版權問題，「要先不顧一切地相信你所想要的，然後再談妥協。如死亡都係喬布斯不得不妥協嘅最後一件事。」
李華華
mailto:[email protected]