【本報訊】有大學生經大學聯校就業資訊系統（JIJIS）應徵教育中心補習導師，疑因拒絕補習安排，不斷收到電話滋擾，有人試過一日收逾150次，接聽後卻無人聽或傳來傳真機聲響，滋擾來電中竟有消委會投訴熱線，有網民在網上討論區指曾有類似滋擾。警方表示收到相關舉報，正調查跟進。
記者：胡仲邦
就讀大學二年級的陳同學半年前在JIJIS登記「多元化教育中心」的補習導師工作，中心陸姓負責人以電話聯絡轉介工作，惟一直不合陳的心意，「我住新界北，佢畀觀塘、將軍澳區嘅補習，每個鐘得四、五十蚊人工，減番車錢根本冇得賺，所以冇做，佢仲日日打嚟，我叫佢唔使再轉介，可能因為咁令佢不滿」。
來電包括消委會熱線
自上個月開始，陳同學發現拒絕陸的轉介後，即收到十數個無厘頭電話，「手機同屋企電話都收到，接電話冇聲，有啲就凈係聽到『啲啲啲』fax機聲，由朝打到晚，凌晨都有，有一日仲打咗成150個，好煩！我曾經打返轉頭，有啲係fax機號碼，有啲就冇人聽，試過一個係消委會投訴熱線，但係我從來冇打過去消委會」。陳及家人不勝煩擾，報警求助。記者在網上討論區發現，有網民稱經勞工處招聘網站向該教育中心應徵，也遇過類似滋擾，有人指被教育中心保留個人資料多年，每天都收到中心的滋擾電話，並曾報警。
滋擾可囚兩月罰千元
記者到位於觀塘港貿中心的多元化教育中心，中心內只有一名男子工作。他沒回應是否為陸姓負責人，惟否認有滋擾行為，又指被人抹黑，他說：「每日最多打幾次電話畀導師，我又冇傳真機，點可以用嚟煩佢地？」他表示警方沒接觸他，又埋怨常有補習導師與家長串通欺騙教育中心補習費。
消委會發言人回應指，該會投訴熱線可傳真收發查詢表格，懷疑事主電話號碼被人挪用，交予該會作為聯絡號碼。
律師梁永鏗表示，若有人不合理不斷致電滋擾他人，警方可用《簡易程序治罪條例》檢控擾事者，罪成可處罰款1,000元及監禁兩個月。警方表示，案件現正調查中，警方本年頭三季接獲2,484宗電話滋擾報案，當中包括電話促銷。