滙控(005)繼續上演人事調動大龍鳳,最新委任司馬安(AntonioSimoes)做歐洲零售銀行及財富管理業務主管。呢個係喺倫敦新開嘅post,華華聽聞,呢個位原本安排由前滙豐香港CEO馬凱博接任,方便交晒成個歐洲零售及財富管理業務畀佢打理,但可能礙於歐洲家經營環境欠佳,馬凱博唔願意調返英國接呢個燙手山芋,索性劈炮唔撈,過檔貝萊德(BlackRock)。
講返司馬安,佢當年跟隨滙控前CEO紀勤嚟香港,做集團策略及規劃主管。滙控家喺香港進行瘦身大計,將佢調返老家,咪可以慳返啲營運預算囉!
滙豐新增義工假
講開瘦身,滙豐早輪宣佈裁員,傷盡人心,噚日唔知係咪諗住返班員工,宣佈實施每年兩日有薪員工義工假。
不過,咪開心咁早,因為有關方面講明,員工只能參加滙豐或者佢認可機構嘅活動,先至計數。心水清會諗,咁咪即係變相叫員工去旗下慈善活動撐場。