特首曾蔭權治港7年，口口聲聲「對得住自己」，但全港市民眼睛雪亮，佢有冇做好呢份工？大家心知肚明。隨住藍籌公佈2010或2011年度年報，今期「趣BlogBlog」統計了46間成份股的打工皇帝（收取最高報酬者），睇吓邊個物有所值、邊個賺取高薪卻不事生產？
貧富懸殊不但出現喺市民層面，藍籌董事回報同樣可以差天共地。以全港打工皇帝、超人李嘉誠頭馬霍建寧為例，去年收取1.54億元酬金，是27間藍籌打工皇帝總和。統計所有藍籌打工皇帝，去年共收取8.49億元，霍建寧單人匹馬獨佔18%，頭10名打工皇帝則佔60%。
霍生收得貴，但絕對值得，起碼將3G由流血不止變成賺錢機器，多年來不斷高價賣資產填氹、用財技整靚成績表等，相比起和黃（013）每年逾百億利潤，霍生人工花紅只是皮毛，有人「做到嘢」，股東唔會詐型。
董事總酬金多過盈利
第二高薪的為滙控（005）前大班紀勤，相當正路。但數到第三，竟然是思捷（330）CEO范德施，收取的總酬金竟然與紀勤相若，即接近6000萬元，思捷股東見到，肯定扯晒火，往後去到股東大會，請大聲喊「回水」。
思捷2010/11年度純利下跌98%，只賺7900萬元，唔單止范德施好意思收取近5800萬酬金，連財務總監周福安亦收取2263萬人工，已經劈炮的高漢思，亦無厘頭有815萬元報酬，統計思捷各個董事，酬金總額9323萬元，多個全年利潤。
一間公司要成功，必須賞罰公平，做得唔好原來都有巨額花紅，如何激勵士氣、改善表現？思捷2009/10年度盈利倒退11%，業績走下坡，作為舵手的高漢思酬金反而按年勁升83%，至1.25億元，全體董事亦平均加薪39%。去年度（2010/11）盈利跌98%，為何董事整體酬金減51%而非98%，就是管理層這種因循苟且的作風，令昔日光環一去不復返。思捷業績後揚言重振Esprit品牌，改變形象，但如果不由管理層內部入手，一切改變只是空談。
中資藍籌打工皇帝是騰訊（700）的馬化騰，酬金2231萬元，排第13，國企藍籌則以平保（2318）張子欣賺1301萬最多，排名已經數到第22位。最諷刺是包尾五間公司，全部都是超級國企：如建行（939）及中石油（857）等，央企打工皇帝年薪加福利盛惠120萬，數字只是分析員或醫生級數。強國潛規則，權力等如金錢，畫公仔唔使畫出腸啩！
股榮