本欄上周五推介世達科技（1282），單日最多爆升31%，升抵目標價0.30元，兼且唔係高開一大截，開市追入仍有大把水位，在跌市下炒上更是難得，收報0.27元，升12.5%，待消化蟹貨後，可再向3毫以上進發。
大市萬九關前唞一唞氣，但注意十大成交牛熊證中，熊證仍佔大多數，重貨區約19200點，唔排除調整後會再挾上。阿爺出手救中小企，對重債股係一大喜訊，玖龍紙業（2689）全年業績披露，負債比率由74%按年飆升至102%，直逼海嘯水平，嚇到大中小戶齊齊掟貨，上月底低見2.99元，過去1年跌足79%，家陣阿爺開聲放水，資金暫不成問題，加上產能持續增長，大反彈可期！
花旗報告指，其實大戶唔擔心玖紙債重，反而關注公司嘅毛利率。家阿爺出招降低融資成本，加上原料成本下降，有助提升毛利，現價預測PE8倍，PB0.6倍，以龍頭股嚟講平到笑！
圖表上，玖紙月初以來以「雙底」形態回升，上周四突破「W形底」後，大行買盤蜂擁而上，加上出現「黃金交叉」，反映升勢漸強，MACD牛差距擴大，RSI仍處於57水平，有力再上衝，目標可見5.50元。
魏力