被日本人稱為「賺錢之神」嘅邱永漢，今年3月底喺自己網上博客寫咗兩篇文推介永保林業（723）。講完之後，佢坐言起行，上星期五率領超過40人嘅日本投資訪問團，去到永保位於中山市板芙鎮嘅新綠洲廠房實地考察。
率團訪問 股價未見起色
早排加拿大上市嘅內地林業股嘉漢林業，俾渾水研究隊冧，所以講起林業股，投資者都聞股色變。永保股價4月底上過6毫嘅高位，之後就持續向下，上星期五就算有賺錢之神到訪，但單日仍跌6.4%，得番0.221元，睇嚟股神效應有限。
除咗睇廠，永保仲安排邱永漢個團去南沙港口，視察集團由非洲入口木材嘅情況，等佢哋對集團營運同業務發展有更深了解。唔知睇完之後，邱股神會唔會撈底呢？