大市連升6日後，上周五終於肯唞一唞，上升的個股主要集中在一些頗為落後的細價股，以及防守性較高的公用股和電訊股上，反而之前由低位急升的個股如珠寶鐘錶股、內房股等皆出現較明顯的回吐，反映經過先前恐慌性追貨的日子後，投資者再吸納的意欲已有所減弱。
雖然大市現水平仍比今年高位低逾24%，但一下子由低位回升咁多，市場上開始有聲音指最壞的時機已過去。不過基本因素實際上並無大改變，歐債危機直至現時為止，大部份的救助措施還停留在討論階段，像Dexia般要拆骨的銀行又唔知有幾多間在後，之前德、法兩國說月底前會訂立詳細援助計劃，即管看看有何招數。
美國方面，再次製造QE3的憧憬，不過頭兩次已證明這只會造成更多炒賣，對經濟幫助唔大不特止，更令人民飽受資產泡沫的煎熬，貧富懸殊擴大，否則都唔會有「佔領華爾街」的行動，要寄望奧巴馬救市的話，就無謂多想，因為方案根本無法通過。至於內地，有高利貸的地方豈止溫州一個，之前中央不斷收緊銀根，由國企至平民都爭相加入放數行列，問題的嚴重性根本無法準確判斷，溫州的引爆隨時只是一個序幕而已。
兩日唔升要減持
大市急速回升，筆者現階段只視之為一個跌得多時彈得多的熊市反彈，大戶這招先逼人斬貨，再引人追貨的絕技可謂屢試不爽，就像07至08年恒指由32000點，跌至20000點邊緣後，也曾出現一段小陽春，令人誤會牛市尚未完結，結果大家都話由32000點，跌到20000點並非最傷，由26000點跌到10000點那一役才令人絕望。不知閣下視現時為真升還是反彈，但總要明白升得多時回調也多的循環，士佳仍會維持見兩日唔升就減持的策略，打陣地戰未是時候。
張士佳
寶來證券（香港）資產管理部董事
本欄逢周一、三、五刊出