梁詠琪（GiGi）於本月3日同相戀半年嘅西班牙籍男友Sergio閃婚，婚後唔夠兩個禮拜，佢又同老公飛咗去內地安徽省淮北出席一個群星演唱會，佢喺上台表演時，仲不時祝福天下有情人終成眷屬，希望大家都甜甜蜜蜜。前晚GiGi表演完，聽日又會轉去瀏陽出席第十屆花炮節開幕式擔任表演嘉賓。然後會先返香港休息，到下個禮拜五再去大連出席Fancl嘅活動。
學做煮飯婆
做完呢啲商業演出後，下月初GiGi會接拍曾志偉執導嘅新戲，佢老公暫時唔會返西班牙住，會盡量抽時間陪喺GiGi身邊，因為啱啱先結婚，兩公婆都唔想分開得太耐，所以點忙都要爭取時間喺埋一齊。
嫁咗人嘅GiGi其實都唔係咁習慣做人老婆，因為以前乜都有阿媽照顧，咁大個女都唔使佢照顧人，但家做咗人妻，佢要慢慢學吓點樣照顧一頭家，當然最重要係學煮番幾味，等老公收工返到屋企都可以食吓住家菜。