樂壇殿堂級歌后「鬼婆」出名麻煩腌尖，佢之前話開告別演唱會，仲打算邀請好唱得嘅新一代歌手「細粒」做嘉賓。主辦單位見有兩代唱得之人同台演出，即刻舉腳贊成，因為一來可以製造話題，二來又可以吸引年輕一輩買飛捧場。
經理人多要求
不過，細粒嘅經理人亦都唔係易話為嘅人，佢之前已經同「孖仔」搞到對簿公堂，最後不歡而散，點知佢對住大姐大鬼婆依然冇面畀，諸多要求兼麻煩多多，搞到鬼婆即刻發老脾，仲發爛渣話唔同細粒合作。其實咁樣對細粒都係一件好事，始終要對住鬼婆鬥唱，佢兩個嘅級數同功力真係有一段距離，細粒家唔使唱，起碼唔使擔心會唱輸畀鬼婆囉。
Textby關仁