9月上旬，桃姐颱風吹襲威尼斯，Deanie姐雙手捧走影后獎座。一個月後，朱茵憑《沒有牆的世界》中的單元劇《第三選擇》，飾演下半身癱瘓的戰士戴夢入圍艾美獎，角逐最佳女演員，恭喜晒。
39歲的朱茵，用了20年時間洗滌性感女星形象，花瓶打爛，朱茵喜極而泣，路縱使崎嶇，努力最終無白費，一切變得值得。 撰文：楊潔雯
於2011年10月4日，朱茵在迷夢中驚聞自己入圍「第39屆國際艾美獎」最佳女演員提名，人生大事，第一時間知會一個重要的人，朱茵揀了黃貫中。之後Paul借機為女友平反，心痛她多年努力只是換來「性感」二字，被一語道破，朱茵的淚腺失陷，愛美神喊到眼妝溶掉，儀態盡失，如果命中注定她有獎，恐怕她當場失控喊到失聲。
恨攞艾美獎爭光
每個人都可以跟蘋果教主喬布斯一樣，一生為着一個目標努力進發；朱茵同樣希望自己的演出得到認同，甚至得到嘉許，花了20年，這個日子到了，卻要面對奧斯卡級數強敵、瑞典矚目女星露美慧柏絲（NoomiRapace）和《哈利波特》英國女星茱莉溫達絲（JulieWalters），她心情緊張再加一點亢奮說：「我係一個華人，真係覺得好光榮，不過為港爭光呢幾個字壓力好大，近年香港女演員的確喺外地大放異彩，所以你問我，我會話既然提名得，冇人會唔想攞。」除了背負為港爭光的壓力，朱茵更加想證明，她多年來對工作的執着，是正確的，她說：「我好多謝評審，估唔到呢啲小本製作可以同大製作睇齊，因為人哋唔係睇銀紙，係睇緊訊息，呢樣令我好感動。」
事業篇：終於得咗
畢業於演藝學院，順理成章被歸納做學院派，演技，應該是他們的賣點，可惜朱茵樣子標致，身材出眾，出道之後，無人記得她的演技是有根基，如今失聲痛哭，可以理解，她心有不甘說：「阿Paul陪我咁多年，佢明白晒！其實我做好多挑戰性角色，《六度心寒》做精神病人，《生命揸fit人》做道友婆，今次幫港台拍，做一個撞車後下半身癱瘓要坐輪椅嘅殘障人士，我覺得個角色好有發揮，當日導演夏桂昌搵我，佢話個角色好啱我，除咗我諗唔到第二個適合人選，不過佢話無錢，唉！港台幾時有錢過，大家明，不過佢哋自由，拍乜都得，再加上我近年無參與大製作，要去參與影展機會係零，今次可以喺國際舞台上沾到邊，唔係任何影展，而係一個頒獎禮，唔係財團就可以做到，真係喜出望外！」
深信努力有回報
性感最吃香，也是娛圈最快上位的手段，所以近年好多腦囟未生埋的模，夾住條事業線講是講非博出位，此乃短炒。長線投資演藝界，單靠性感，欠持久力，要改頭換面又談何容易？朱茵硬頸，用了20年時間改變自己，她說：「我足足用咗20年時間磨練自己嘅演技！我要比其他人做得更多，《二人三足》我唔化妝，好似我做精神病人，我專登自己畫大啲個眼圈，醜化自己，我完全唔介意醜樣，只要努力係會有人知。」事實證明，性感和實力可以並存，朱茵好高興。
愛情篇：找到最愛
奉朱茵口諭，一眾少女、中女、剩女、宅女、乾物女，只要你是求戀期，最好戴眼識人。「我奉勸未有男朋友嘅女仔，無論乜年紀，千祈唔好睇佢賺幾多錢，有冇樓，唔好為物質而去擇偶，用心錫你先係最緊要，成日話要照顧你等你唔使憂嗰啲，唔好諗，唔好嫁錢，衷心對你好可能得一個，要信自己搵得到，唔好騎牛搵馬。」朱茵綜合自己的拍拖經驗，得出以上的結論。
男友冇錢但有愛
黃貫中47歲，冇錢，大埔有間村屋，但勁錫朱茵，事事招呼周到，車出車入，去超級市場買嘢會自己拎哂，不時會逗朱茵開心說：「你一定有機會攞獎！」最重要是，他打算迎娶朱茵，照顧她下半世。
朱茵找到一個如意郎君，她說：「佢係我靈魂伴侶，又係我情人知己，人生何憾！靚衫我有，鑽飾我好少戴，一來怕唔見，二來我已經發緊光啦！錢、要名要利，你又攞得幾多？永遠追唔完，所以我都好欣賞佢交朋友唔睇背景，啱傾先交，唔睇人開乜車着乜衫，最緊要搵個價值觀相同嘅人。」
終極篇：邁向幸福
有人會問，朱茵點解不選擇一個更好的？究竟甚麼才是最好？值得深思，此時此刻，朱茵感到Paul是最合適的，她滿足地說：「乜先係最好？我諗佢已經係最好，我哋一齊超過十年，我哋兩個人嘅理念一樣先會走埋一齊，佢又咁藝術，我又咁藝術，佢搞個演唱會倒水咁倒，但最抵死係我又明白佢，你話我做舞台劇有幾多錢？今年我接咗個舞台劇《再見女郎》，同我演藝嘅同學、舞台劇帝陳淑儀合作，對我嚟講好有挑戰性，仲係做一個帶住個女嘅歌女，Paul就係鍾意我接呢啲嘢嚟做，你話我哋係咪靈魂伴侶喇。」
「佢對我死心塌地」
Paul有點表裏不一，Rock友造型附送紋身，但骨子裏是一個貼心又細心，孝順又良善的傳統大男人，朱茵說：「佢認為男人要照顧女人，佢買嘢拎到成棵樹咁，都只會一個人拎晒，佢又好尊重長輩，唔只係我爹哋媽咪，佢對泰拳個師傅都好尊敬，大時大節梗準時送禮，約咗長輩就好似如臨大敵，有時我自己都會冇大冇細。」傳統男人，一定想結婚生仔，Paul不會例外，朱茵說：「有計劃，只係家太忙，我係一個完美主義者，我唔會肯是是但但，我睇到人着婚紗行禮，我都會想咁，不過大家唔使擔心，呢樣嘢佢緊過我，可能佢會覺得對我唔住，所以我話呢個男人對我死心塌地，會企喺我嘅角度諗，我就係鍾意佢咁樣大男人。」朱茵就可以繼續做一個幸福的小女人。
