今年有份參加亞洲小姐嘅42位佳麗，日前喺亞視總台着住泳衣見完評判同傳媒，噚日馮仁昭喺尖沙嘴撞見佢哋，原來亞視安排佢哋見化妝師同髮型師，設計新造型。
曾是英皇小花
順利入圍嘅有「白雪奇葩」馮雪冰、「Old嬋組」嘅司馬燕表妹陳麗文、17歲嘅康馨月、梁樂思外，仲見到一個熟口熟面嘅女仔，佢見到記者仲好大方咁打招呼。
經過打聽之後，原來佢係英皇過氣小花、曾拍《四葉草》兼喺09年曾參加港姐面試嘅王家敏，現年26歲，報稱係財經公關嘅王家敏，似乎對娛樂圈念念不忘，做唔成歌手，再戰選美台，今次順利入圍，又即管睇吓佢可唔可以夢想成真。
另外，以47歲高齡爭艷嘅施熙瑜，聽講亦順利入圍，不過變身後匆匆行側門離開，無緣一睹新形象。一班佳麗經過改造後，好快正式見人，跟住就會接受一連串訓練。