王維基搞免費電視台，向無綫幕前幕後大挖角，一時間搞到無綫陣腳大亂，八方收到風，日前仲有亮相台慶騷嘅無綫國際業務總經理嘅陳碧鏵，突然以私人理由請辭，做到今個月31日離職，去向暫未透露。
陳碧鏵之前喺八達通做行政總裁時搞到滿城風雨，但依然獲六嬸方逸華賞識，今年初加盟TVB，當陣時好多人以為佢轉戰電視城大展拳腳，家坐低唔夠八個月就起身，有人估佢做得唔開心，同受唔住壓力而離職。
無綫外事部副總監曾醒明噚日同八方證實陳碧鏵離職嘅事，話陳碧鏵走咗之後，職務將由集團總經理李寶安兼任，祝願陳碧鏵有美好將來同生活愉快。