「人民力量」黃毓民以前掟蕉掃場，俾立法會主席趕出議事廳，係意料中事，但前日企定定、文縐縐問煲呔點解委任低民望林公公做司長，都被逐出場，仲要俾立法會保安整到隻腳腫晒，相信冇人估到。「大嚿」陳偉業噚日話，其實早前喺立法會新大樓揭幕時，已有熟悉風水朋友話一睇黃毓民辦公室已知佢嚟緊手腳會受傷，要擺個葫蘆喺房擋煞，唔知係咪因為未擺，所以出事。
黃毓民噚日話腳腫不消提，做完物理治療、搽藥膏，仲要食止痛藥，先至可以返到立法會開會，直指現時立法會保安比以前「狼死」得多，以前等指示行動，家卻喺議事廳內橫衝直撞，完全視民選議員如無物，真係離晒大譜。