無綫新人走，亞視舊人來，做過短時間亞視主席嘅張永霖噚日重返ATV，今次任務簡單啲，做文化資訊節目《藏．寶》嘉賓，講吓過去十幾年收藏中國近代畫心得，仲將部份藏品公諸同好。張永霖自稱係財力有限嘅打工仔，只以閒錢買畫，買唔起動輒千萬元成交嘅一級西洋畫，十幾年前張大千等名家嘅畫作，就幾萬蚊至十萬左右已有交易，所以係佢主攻收藏。佢話收藏唔係以價錢衡量，試過喺歐洲地攤買到好嘅藝術品，亦買過唔少複製品，假的真得了，掛出嚟一樣咁靚。
名畫有升值潛力，張永霖話買畫冇諗過投資，笑言藏品冇乜升值，賣畫更加非常麻煩。佢唔肯透露多年來用咗幾多錢買畫，話等於問佢三圍數字，咁敏感唔識答。