陳豪和陳茵媺的戀情隨着被發現同居互餵而浮面，公開後表現甜到漏，相反陳豪舊愛廖碧兒卻和林忠豪分手收場，人財兩失。前晚陳茵媺到灣仔出席活動，被問到有否信心綁實陳豪免被廖碧兒翻啅？陳茵媺直言：「OK喇！」
被譽為圈中「筍盤」的陳豪當日雖然被廖碧兒狠飛，但不久即和合作拍劇的陳茵媺撻着，兩人被發現在女方位於深井家過着半同居生活，陳茵媺更細心餵陳豪食維他命，認真甜到漏。相反廖碧兒和李澤楷表弟林忠豪不足一年的戀情已玩完，人財兩失。
「開心就OK」
前晚陳茵媺到灣仔出席時裝活動，外籍設計師專程送上一套喱士靚衫給她作見面禮，陳茵媺表示自己也很喜歡喱士衫，因為性感得來有種神秘感。會否專登揀一些喱士內衣給陳豪欣賞？陳茵媺即尷尬說：「呢啲唔好講，唔好問，不過內衣對女仔嚟講好重要，唔係話要畀人睇，最緊要係自己着得舒服，因為係好貼身。」
提到林忠豪和廖碧兒分手後力追莊思敏，陳茵媺表示：「我唔知，我同佢哋都唔熟，同廖碧兒又唔熟，冇回應。」但會否擔心人財兩失的廖碧兒翻啅陳豪？她聞言表示不回應，是否對自己有信心可以綁實陳豪？陳茵媺笑言：「OK喇！呢啲順其自然，開心就OK，因為生命好短暫。」
人氣勝可頤
近日有傳因陳茵媺人氣急升，在新劇《天梯》中搶走女主角張可頤的戲份，陳茵媺謂：「冇可能，添哥（監製李添勝）嘅劇本一早已經寫好晒，我唔覺啲戲份有調動，可頤係我師姐，我好欣賞佢。」另外陳茵媺昨日在電視城為剛播出的新劇《法證先鋒III》宣傳，由於收視高開，黎耀祥笑言叫在劇中晒黑bra的陳茵媺一同夾錢請食飯，最好陳豪也夾一份，陳茵媺笑言：「睇吓有冇下一套《法證》先，佢都冇份拍呢套，如果將來真係開拍一齊合作都唔介意，好開心。」
採訪：胡比、譚倩宜
攝影：黃文偉、葉君海