【本報訊】記者到購入12條巨型大頭魚的蔚濠海鮮酒家放蛇，甫入門口，即見大堂放着一個人頭般大的「冰鎮魚頭」，旁邊寫着「極品大魚頭」。店員陳先生上前推銷，笑稱：「咁大個頭好少見！」他即場將魚頭上磅，重6斤12両，整個約售800元。他說這條「淡水龍躉」總重30多斤，「噚日到貨先劏，唔係成日有！」
極力推銷吃大頭魚
陳落力推銷，指這條是鱅魚，俗稱大頭魚，可一魚數食，包括蒸、炆、燉湯及炒球，並強調：「冇分季節，不過唔係成日有！」因此到貨才通知熟客，他更熱情謂：「噚日先劏咗一條，三圍枱食！」問及貨源，他笑道：「知唔知邊度船灣淡水湖呀？新娘潭嗰度呀！啲人冇嘢撈咪去捉魚囉，呢條直頭係水塘霸王，最少十一、二年先有咁大條，要落網先捉到！」
陳續說：「魚身冇咁好食，淡水魚呢，淨係食個頭㗎咋！」他指魚頭可清蒸或燉湯，並極力推介燉湯：「咁大條魚，啲皮蒸成個鐘都嫌韌呀，燉湯就好鬼甜，川芎白芷天麻燉魚頭最一流！」
記者叫了一碟「碧綠炒球」及「生炆頭腩」，炒球魚片切得甚薄，入口爽脆，質地似鱔肉，惟無甚魚味，需點蠔油同吃。另一碟生炆頭腩較入味，惟魚骨極多，入口與一般淡水魚無異。陳表示，炒球加上炆頭腩共20両，按20両售168元計算，每條30斤巨魚便售得約4,000元。換言之，酒家扣除購買12條巨魚的1萬元成本後，便有近4萬元利潤。