宇宙最強的甄子丹和太太汪詩詩育有一對子女，子丹昨日出席嬰兒用品活動，自爆很想追生仔生女打孖上，但被太太以他不夠「乖仔、成熟」拒絕。至於姨仔汪圓圓和玩具大王幼子蔡加讚好事近，他大讚蔡加讚乖仔及啱傾。
甄子丹、琦琦、歐陽妙芝和羅霖等昨日在中環出席嬰兒車活動，甄子丹坦言一見到嬰兒車就想追多個：「不嬲都想要，老婆就唔知。」那為何不生？宇宙最強的他即時說：「太太話要我乖仔啲、等我成熟啲，同埋要等我多啲時間喺香港先得。」他指女兒Jasmine想要妹妹，兒子就想要弟弟，甄子丹笑言不介意打孖上生對twins。
嘆家庭樂仲攰
早前放了半年假，甄子丹近期已復工拍片，他說：「半年話咁快就過，搭地鐵咁快，家喺香港拍片，有好有唔好，我都同劇組講笑要7點放工，返屋企食飯。」他指雖然有住家飯吃，但體能消耗更大：「又要陪仔玩，又要同老婆傾偈，成一兩點先瞓，拍喜劇又要諗，又要keep住個hyper狀態去笑，所以都好花精神，有時一晚得一兩個鐘頭瞓。」
問到姨仔汪圓圓和玩具大王幼子蔡加讚似乎好事近，他也大讚蔡加讚：「佢幾乖仔，兩個都好夾。」汪圓圓指要以甄子丹為榜樣，他說：「佢都好gentlement，好nice，有自己個人優點，我哋都幾傾得埋。」看來蔡加讚連未來姐夫一關都pass了。
琦琦叫JC反省
同場歐陽妙芝的一對兒子也在場，她大仔早前扮蜘蛛俠跌斷手，昨日現場繼續和弟弟爭咪玩。對於JessicaC.涉嫌偷竊，前輩妙芝和琦琦都希望她能反省改過，妙芝說：「可能佢一時糊塗，冇諗過後果咁嚴重，希望佢經一事長一智。」琦琦就說：「600元對model嚟講唔係好多錢，但對一個家庭可以食好多餐飯，希望佢加倍努力，慢慢反省，彌補過失。」
採訪：梁錦雯
攝影：黃文偉
