車路士嘅英格蘭國腳後衞艾殊利高爾（A高）滾女同踢波一樣咁叻，仲係乜類型都有，有空姐有舞女，亦有大明星，但我求大俠估唔到佢巴閉到好似經典港產片《旺角揸fit人》嘅蘇威咁，連孖妹都玩埋。呢對孖妹來頭亦唔惹少，除咗事業線超深超長之外，仲要係《花花公子》嘅玩伴，睇嚟A高都好識食。
成晚睇艷舞左擁右抱
A高係世界級左閘，雖然到咗12月就滿31歲，不過仍然保持高水準，所以吸引到西甲嘅皇家馬德里、巴塞隆拿，同埋俄羅斯富豪球會馬哈奇卡拉向佢招手，盛傳馬哈奇卡拉仲出到20萬鎊（約240萬港元）周薪利誘佢過檔。佢除咗喺轉會市場有價有市，去到女人堆度一樣係搶手貨，亦逢女都啱，俾佢搞過嘅女不計其數，當中包括住家菜梅麗莎、艷舞女郎珀內爾同埋空姐美迪絲。
唔知係咪想尋求「突破」，A高日前就被踢爆轉玩3P，仲要係玩孖妹㖭。據了解，佢早排去位於倫敦嘅PLAYBOYCLUB玩，邀請咗現年21歲、上圍有成32DD嘅孖生姊妹卡娜同埋瑪莉莎，入佢間私人廂房同佢一齊玩。據其中一個顧客表示：「佢哋兩個入到房之後，一個坐A高左邊，一個坐A高右邊，A高名副其實係左擁右抱。佢哋都好冧A高，A高亦好冧佢哋。」呢位人兄仲話：「佢哋兩個成晚都冇離開個A高邊半步，仲跳埋舞畀佢睇。A高亦唔敢相信，自己竟然可以同對孖妹起雙飛。」
玩完益歌星老友
查實卡娜同瑪莉莎呢對孖妹好有來頭，本身係《花花公子》玩伴，仲成日獲邀出席喺雜誌創辦人赫夫納間PlayboyMansion搞嘅派對，仲幫美國著名歌手50Cent拍過MV。A高仲食過翻尋味，之後仲帶埋其歌星老友SnoopDogg齊齊玩孖妹。
A高雖然爛玩，不過喺球場仍能繼續交足功課。究竟佢喺明年會唔會繼續留喺車仔，喺下年1月或7月時就有答案，但如果佢揀去俄羅斯踢波，囡囡肯定係其中一個原因。點解？俄羅斯超多金髮靚女，而且仲有玩家卡路士帶路，足以令搵緊富豪級人工嘅A高口水都流埋啦！