碧咸（圖）嘅球員生涯已進入倒數階段，所以都着手鋪後路，日前接受訪問時向母會曼聯獻殷勤，話想做紅魔體育總監。佢話：「見到施丹返皇馬做顧問同幫手教波，我都好想返曼聯出分力。99年紅魔做3冠王係我最光輝時刻。」碧咸仲賣口乖，話世上冇一間球會嘅成就可以媲美曼聯。不過，碧咸去左美職落班後，成家都好適應美國嘅生活，要佢哋返去成日落毛毛雨嘅曼徹斯特，怕且都唔易。