曼城「麻煩友」泰維斯（圖）喺上月底歐聯拒絕上場，搞到滿城風雨，呢位阿根廷球星嘅形象亦插至新低，仲被會方罰咗半個月糧同埋停賽兩星期，件事仲有下文，曼城已完成內部調查，指佢冇聽從領隊文仙尼指示。睇嚟曼城啖氣仲未落，計劃向職業足球員協會提出，延長停賽令多1個月，同埋再罰多1個月人工即100萬鎊（約1,200萬港元），最快今日就知結果。