0:1負伊拉克 跌落第3中國世盃夢危

0:1負伊拉克 跌落第3
中國世盃夢危

【世盃外亞洲區A組】國足勢危!中國國家足球昨晚在2014世界盃外圍賽,縱有名帥甘馬曹領軍,又有主場之利,怎知攻不強、守不穩,0:1不敵下半場得10人應戰的伊拉克,3戰得3分排第3,爭出線可能又要再等多4年。賽後,國內網民指摘中國足協陣前聘請甘馬曹領軍無用。

國足在深圳體育場估計約31,000名球迷面前,上演世盃外亞洲區A組第3輪賽事,主場迎戰伊拉克,全場一片紅海,聲勢強勁;可是開賽初段,中國未能藉主場氣勢及天雨而佔到任何優勢,反而被巴西名帥薛高執教的伊拉克佔得甜頭。9分鐘,伊軍前鋒穆斯達化卡連接應直傳突破越位單刀施射,被及時出迎的國足門將楊智救出。

伊拉克(白衫)完半場前攻破國足大門,中國隊長李瑋峰(中)非常無奈。新華社

甘馬曹(中)昨仗在後備席見國足表現不濟,坐立不安。特約記者傳真

中國球迷寄望甘馬曹領軍殺入巴西決賽周的美夢,越來越渺茫。特約記者傳真

尤尼斯一箭定江山

中國捱過初段後開始站穩陣腳,教練甘馬曹可能有感中場組織力非強,故部署加強中場壓迫,進攻則集中利用黃仁亮、於漢超、郜林及陳濤幾名攻擊球員的速度及個人突破能力,在兩路發動攻勢;戰至中段,這招看來初步奏效、主導中場,可惜陳濤及郜林的射門不是斜出,就是被伊拉克門將所阻,球迷在現場還有興致玩人浪助威。
伊拉克頂住中國攻勢,在上半場補時階段把握中國中堅杜威防守失誤,由穆斯達化卡連左路妙傳中路的隊長、07年亞洲足球先生尤尼斯門前撞入,伊拉克亦靠這個入球,半場領先中國1:0。

網民鬧足協搵甘馬曹冇用

易邊後,主隊面對進一步加強防守的伊軍,礙於組織力弱,攻勢較上半場更疲弱,殺入禁區次數甚少,惟有靠遠射;只是射門冇準,就算換入吳坪楓及張呈棟,客軍縱有阿巴斯兩黃一紅被逐,可是國足仍無起色,最終主場輸波。中國球迷賽後無聲離場,網民賽後則狠批國足表現不濟,更指中國足協賽前兩個多月找來甘馬曹領軍,對國足沒有幫助。甘馬曹賽後則承認爭出線形勢非常困難,但仍未絕望。
同組另一場,約旦作客3:0大破新加坡,目前3戰全勝居A組榜首,伊拉克得6分排第2;3戰得3分排第3的國足,下場作客伊拉克可說是出線生死戰,必須全取3分,才能保出線希望。本報深圳專電

《花絮》
伊拉克粉絲踩場

伊拉克作客深圳,都有粉絲(左)專程撐場;俾人踩到上心口,一班喺門外賣中國紀念品嘅後生仔睇唔過眼,走埋去大叫「中國必勝!」

黃牛黨門票割價求售

中伊大戰門票好早賣晒,造就黃牛黨出嚟搵食,現場所見,380蚊人仔嘅門票開高一倍價錢;但到開賽前15分鐘,黃牛黨仲有成叠飛,最後要割價求售。

南非魔笛深圳暢銷

話晒主場,當然要畀啲主場氣勢,威震南非世盃嘅「魔笛」Vuvuzela就大派用場;賣紀念品嘅王小姐講,呢個價值30蚊人仔嘅小喇叭好好賣。

朴主永返國家隊生猛晒

喺阿仙奴坐冷板凳,一場英超都未踢過嘅南韓前鋒朴主永,返到國家隊就精神晒,周二B組主場對阿聯酋,憑佢先開紀錄、加上對手擺烏龍,主場贏2:1出,3戰2勝1和。朴主永近4場國際賽入7球,腳風順到不得了,阿仙奴領隊雲格係唔係要考慮重用吓佢呢?

記者採訪獲派三嚿水

國足大戰伊拉克,西班牙傳媒亦有派記者訪華報道,贊助商通常都有禮品包派畀記者。有位西班牙記者就好開心咁自拍拆禮物包,拆到有個信封,攞出300元人民幣好開心(圖),亦笑咗出嚟;睇嚟佢係唔知道,派錢係國內傳統,真係大驚小怪!