中華網（8006）母公司CDC集團，上個禮拜二向美國法院申請破產保護，中華網喺內地知名度唔低，董事粒粒皆星，好似主席錢果豐，就係政經界名人。噚日CDC公佈，任命新華社前高管周順敖為公司獨立董事兼董事局副主席，據介紹，周順敖喺新華社工作超過30年，唔知對一間申請破產保護嘅公司有乜幫助。
講起錢果豐就醒啦，中華網噚日刊發公告，話錢果豐喺CDC集團申請破產保護前一日，就同CDC劃清界線，辭晒主席同非執董職務。
不過，錢果豐跳船嘅消息，早喺上個禮拜由恒生（011）、港鐵（066）同九倉（004）「率先」公告，皆因錢果豐喺上述3間公司兼任董事職務，董事資料有變，上市公司當然要披露。同理，由錢果豐出任主席嘅中華網，噚日刊發公告披露，但就遲咗啲喇。