早前AIA（1299）宣佈，豪擲1億培訓新員工，吸引唔少後生仔加入，包括選過港男嘅單俊偉。噚日AIAPremierAcademy舉行開幕禮兼第一批學員畢業禮，單俊偉可以話係全場焦點。
較4年前瘦咗成個碼
人如其名，單俊偉真人果然俊偉，好嘢當然唔好埋沒，所以2007年佢走咗去選香港先生，雖然當年攞冠軍嘅港男係袁偉豪，但到家陣記得嘅人真係唔多。事隔4年，瘦咗成個碼嘅單俊偉唔做港男奀星，受訓做財務顧問。佢同華華講，保險呢行着重溝通，好適合佢，又可以照顧吓朋友，幫佢哋管理財務，為佢哋生活帶嚟保障。上完3星期課程，單俊偉對於保險Agent呢份工，果然入型入格！
佢仲話，保險業呢個餅唔會咁快分晒，可以自己做多個餅去分，因為市場上面仲有好大空間，可以推出唔同產品。真係樣貌與智慧並重。
除咗港男，同場仲有一位靚女，不過唔係港姐，而係喺廣告公司工作嘅郭美盈。成日有人話香港保險業已經飽和，郭美盈喺廣告公司啱啱升職，大好前途，所以屋企人都唔贊成佢入保險業呢行，但睇到佢喺課程上面學到嘢又簽到保單，有前途又有錢途，所以佢媽咪噚日都出席乖女畢業禮支持。而當代表同學上台講嘢時，郭美盈仲眼濕濕㖭。
李華華
mailto:[email protected]