自從8年前起，每逢10月10號都令大家憶起樂壇天后梅姐梅艷芳，噚日係梅姐48歲生忌，嚟自世界各地嘅fans都用唔同方式向梅姐講聲生日快樂！梅媽覃美金同梅啟明噚日中午1點分兩架車，拎齊祭品同大香去到梅姐生前位於壽山村道恒安閣寓所，原先準備入屋拜祭，點知佢哋唔肯簽一份事先訂明、內容話唔可以破壞屋內任何物品嘅文件，被保安拒於門外。
Fans自製紀念冊
梅媽惟有坐喺地下大堂等候，而手持法律文件嘅梅啟明懷疑屋內數百件遺物被爆竊，即場報警求助，佢話有證據喺手要告好多人，搞咗一輪佢哋都係冇拜祭到阿梅。
另外，除咗近百fans去到阿梅故居外，又有20幾個粉絲冒雨去到九龍塘省善真堂拜祭阿梅，佢哋不停摺元寶，又準備晒自製紀念冊、名牌篋、手袋同鞋化畀阿梅，阿梅靈前又有海南雞飯、杯麪同糕點，其中兩張生日卡分別以阿梅森巴女郎同仙鶴神針造型製成。
梅媽擺攤攞簽名
此外，噚晚有180位fans齊集尖沙嘴舉行《珍惜聚會時2011》自助晚宴，場內仲有義賣DVD同相片嘅環節，又展出日前fans投得阿梅嘅遺物，阿梅好友蘇小姐話今年特別搵咗一批梅姐嘅微笑相同大家分享。同場梅媽派出代表擺攤位要求《反對梅艷芳寃案判決》簽名，簽名人士會有頸鏈作紀念，不過反應麻麻。