前高爾夫球「1哥」活士自從「感情缺失」之後，真係冇乜日子好過。好好地傷癒復出，練新打法又唔係打得好；喺星期日嘅聖馬田高球賽最後一圈，佢仲俾人掟熱狗，「老虎」活士變「老鼠」活士，慘過「過街老鼠」。
呢兩年頹爆嘅活士，啱啱到個勞力士贊助，以為終於衰完，點知喺聖馬田高爾夫球公開賽周日比賽中，佢喺打第7洞俾球迷掟熱狗！雖則係喺成40呎老遠掟埋去，但條腸都上到果嶺，呢位31歲球迷都算幾好手力。
雖則掟唔中，不過活士梗係唔多like：「佢想見報啫，家上硬頭條啦！」活士仲話條友知道自己做緊乜，因為佢掟完就好乖咁趴喺地，雙手擺喺背脊等被捕。奇就奇在呢度，連逮捕佢嘅警員卡度沙（JoseCardoza）都話：「佢好合作，身邊嘅人都問佢點解咁做。佢就冇出聲，淨係搖頭，個樣仲有啲後悔㖭！」搞事球迷之後就以滋擾公眾罪被趕咗出場，仲有可能要坐監。
打到出晒界排30
同活士同組嘅艾爾禾（ArjunAtwal）就話警察冇開槍，算佢好彩：「佢哋可以射佢㗎！警察完全有理由相信，佢唔係掟熱狗咁簡單。」有冇咁誇呀？不過原本係賽事焦點之一嘅活士，就俾條熱狗搶晒鏡。而另一個同組球員柏比寧（RodPampling）就話：「呢件事認真怪。」有幾怪？有人話生事者之前飲過酒，睇個樣咪又係飲大咗！
活士冇中招，但都贏唔到。佢雖然狀態唔錯，但睇嚟仲未熟識新打法，仲有球打到出界咁滯，最後佢以第30名完成賽事。至於冠軍就由美國球手莫達（BryceMolder）贏咗，但贏得唔輕鬆，佢同對手巴爾特打咗成6個附加洞先贏到之前一直領先嘅巴爾特，成為今年最長加時嘅高球賽，真係辛苦晒。