星展銀行（香港）行政總裁龐華毅（圖）（SebastianParedes），舊年9月接替退休嘅Amy姐葉約德，唔經唔覺嚟咗香港都超過一年。
呢位拉丁美裔銀行家，來自有「香蕉之國」美譽嘅厄瓜多爾，從事銀行業廿幾年，管理足迹遍佈南北美歐亞洲。佢話初到香江，環球經濟形勢仲算藍天白雲（skyisblue），市場復蘇有望，但家吓歐債問題籠罩，外圍市場危機四伏，「個天空（經營環境）越嚟越烏雲密佈！」
以前做賓架，最自豪莫過於銀行「晴天雨天都喺你身邊（借錢畀客戶）」，時移世易，國際監管要求成座山咁高，今時今日，Sebastian話，無論「晴天雨天」，最緊要係做「審慎賓架」（prudentbanker），千祈記住地大「勿博」。