自稱X-Men粉絲，拍晒心口以為好了解變種人特性，點知數數手指，結果淨係識狼人、ProfessorX以及磁力王！最新Blu-ray《X-Men：TheFirstClass》正式落場，呢集前傳除講述兩大首領嘅輕狂歲月，Bonus仲收錄變種人資料庫，讓你睇片前做足熱身，而特別珍藏版更附送40頁精美劇照，實行俾大家慢慢翻舊賬。
記者：陳國輝
打定底了解變種人
無論你之前有無煲開X-Men系列，睇完呢集，肯定對後生又靚仔嘅ProfessorX同埋磁力王感到陌生！無他，除咗故事大綱回到二次大戰之後，最熟悉嘅暴風女神、雷射眼等尚未出場，至於狼人亦僅出鏡不足10秒，無追開真係一頭霧水！建議各位喺開場之前先睇Bonus，了解吓ProfessorX、玻璃妖后，甚至前幾輯嘅靈鳥、雷射眼等變種人嘅背景資料，打定底溫習吓。
但係對超級Fans嚟講，區區一段Bonus未必滿足到，查實行貨Blu-ray亦推出限量珍藏版，佢包裝成鋼盔設計，原來拆出嚟係盒蓋，入面更附送一本硬皮加燙銀封面、多達40頁嘅精美相簿，並有大量劇照和製作花絮，肯定係Fans必儲Item。
吊起潛艇畫面震撼
討論區網友批評，電影版實在改得太多，跟原著漫畫有出入！無錯，雖然X-Men角色嘅年紀、背景以及關係都被電影改寫，但講到CG震撼場面，依舊有美國漫畫味道，甚至比原著更加精采！第一幕必睇位，係磁力王將成艘潛艇吊上半空，當佢升上水面嗰刻，若然你家中使用50吋以上電視觀賞，或者巨型投射幕牆的話，效果肯定超震撼；此外，尾段幾十發導彈射向美蘇戰艦嗰陣，畫面亦相當壯觀。
音效上採用英語DTS-MA5.1，用嚟測試各類低頻爆炸聲，或移動物件時產生嘅聲源位置，效果非常逼真！特別一提，想測試家中音響嘅高頻質素，睇到妖后以手指出一塊圓形玻璃嗰幕，其產生嘅高頻效果將會好刺耳！另劇中一名X-Men成員，佢以高頻尖叫聲控制於海上飛行，呢一幕大家也可測試高頻以及海洋空間嘅模擬效果，但整體上，靠低頻炸屋嘅成份唔多，反而高、中、低頻所佔比例都非常平均。
$199（普通版）/$299（限量珍藏版）
