當保時捷跑車無敵震天的咆哮聲消失了，飆車時再感受唔到明顯的引擎運轉聲，這還算是保時捷跑車嗎？反傳統當然有它的道理，將PanameraS掛多個Hybrid招牌，不是為跟隨潮流搞環保，而是想話畀人知，就算是Hybrid，保時捷都可以做到一架靜音電悍馬。
記者：趙慧敏
攝影：劉永發
油耗大幅下降
作為保時捷車系的房跑型號，對PanameraSHybrid寄望高少少絕對可以理解，雖然早前Cayenne已推出Hybrid版，不過始終屬SUV車形，比起PanameraSHybrid打正旗號以性能掛帥的房跑，我諗絕大多數人都將它與電油版性能作比較。PanameraSHybrid的動力心臟靠一副3公升Supercharged引擎同步電動馬達結合，提供380匹馬力，而550Nm的巨大扭力於1,000rpm已開始釋出，0-100km/h只需6秒，極速240km/h，以車重達1,980kg來計，其表現已經與V8偈PanameraS差不多，不過油耗就相對減低了不少，以車廠提供14.08km/L油耗計，都是約$1.1/km。
真實寧靜享受
無可否認，PanameraSHybrid不是以保時捷死硬派為主要對象，今次雖然與它只可以有兩小時短敍，但不得不承認它確能帶給你另一種嶄新駕駛享受，開車後車廂內極度寧靜，對於要依賴聽覺挑起野性的車手，可能會覺得脂粉味重，不過骨子裏充滿GT本色，處處流露出保時捷的DNA。雖然係一部超過五米長巨無霸，但處理彎路時，靈活性及強悍度依然不減。
PanameraSHybrid無論起步及加速狀態都由油電同共運作，於高速巡航時，就由引擎驅動，馬達會轉為充電功能，當行車時駕駛者收油或煞車時，系統都可將能源據為己有，為電池儲電，根據親身測試，儲電速度甚高，尤其置身落斜路面。至於另一個慳油裝置則是E-Power按鈕，按下去，全車就可以用純電模式行駛，最高時速更加可達到185km/h。至於近年必備的Start-Stop熄匙系統當然唔少得，不過值得一讚的，是每次重新點火時，車身震動非常輕微而迅速，不會破壞車廂的寧靜環境。
獨特銀綠響應保環
外形上，PanameraSHybrid雖然與同Panamera車系沒有太大分別，不過今次車廠特別挑選了一款較特別的色系CrystalGreen，於陽光下閃出銀光，可能就是為配合其環保主調，不過泊在路邊，的確十分搶眼。
PorschePanameraSHybrid
引擎：2,995ccV6Supercharged+電動馬達
馬力：380hp/5,500rpm（混能）
扭力：580Nm/5,000rpm（混能）
傳動：8前速TiptronicS
售價：$1,772,000起
查詢：29262911（PorscheCentreHK）