俗稱AO嘅政府政務官，被調來調去係平常事。華華近日睇財經事務及庫務局網站，發現甄美薇（Salina）調咗嚟財經事務科做副秘書長，佢原本喺民政事務局做副秘書長，今次同財庫局副秘書長鄭恩賜互相調位，拍番住頭箍小姐區璟智做嘢。
曾捲入仙股風波
Salina十年前就喺財庫局做首席助理秘書長，02年7月新老細馬時亨（圖）上場，鬧出仙股風波，當時港交所（388）公佈諮詢文件，股價低於5毫子嘅股份要除牌，引發細價股大跌，肥馬去立法會解畫時，話文件公佈前根本未睇過。事實係，下屬曾經向佢提交文件撮要，所以肥馬後嚟俾人批評話冇睇文件，至於嗰位下屬，咪就係Salina囉！
事後Salina調咗去同一個局嘅庫務科，負責撰寫財政預算案演詞，再之後去過衞生福利及食物局，同埋港府駐日內瓦經濟貿易辦事處，09年去到民政事務局負責文康政策。
十年後再跟區璟智
十年前Salina嘅直屬上司係財庫局副秘書長區璟智，所謂山水有相逢，今日區小姐係該局常任秘書長，又做番Salina上司，不過十年人事幾番新，Salina前排出席監察西九文化區計劃小組委員會會議，比以前更添風韻。
李華華
mailto:[email protected]