【本報訊】「票賊升官！」「不要狗奴才！」政務司司長林瑞麟上任才十天，港人對無德無能者升官的怒火，越燒越旺。3,000市民昨參加「十月九踢走林D9」遊行，聲討港府晉升民望最低的局長。遊行隊伍突破警方封鎖線，成功進入新政府總部，在特區旗杆貼滿「不要林D9」貼紙。民陣指遊行人數遠超預期，反映民怨沸騰，「民意已經好強，家主導權喺政府，曾蔭權同林瑞麟都要問責下台﹗」
記者：白琳 陳雪玲
遊行人士昨佔據銅鑼灣東角道整個行人專用區，叫得最響的口號是「林瑞麟下台！」隊伍經軒尼詩道入夏愨花園對出約得3米的行人道時，不滿警方未有封閉任何行車線，須上落電梯才到達政府總部，擔心人多危險，隊頭市民一度報以噓聲，隊尾人民力量成員及「V煞」一度鼓譟，在海富中心對出馬路坐下「縛鞋帶」，擾攘十多分鐘。民陣召集人黎恩灝批評，遊行人士眾多，警方不肯封鎖夏愨道，對傷殘或年長的示威者不便。
示威者被拒進入廣場
行政署以示威區未開放為由，拒絕示威者集會。數千計市民在狹窄行人路集會，有市民被迫移開警方的雪糕筒期間，與警員口角。古思堯與幾個社民連成員跨過鐵欄，率先佔領示威區旗杆下的台階。其後示威者陸續推倒鐵馬進駐，大叫「人民勝利」。黎恩灝批評混亂由行政署一手造成，「李克強8月來香港，廣場已經開幕，點解行政署仲可以用廣場未啟用為由拒絕我哋使用﹖」
社民連成員梁國雄指，若林瑞麟連任下屆政務司，勢必「23條」重臨，因只有他才「咁夠膽兼無恥接受呢個任務」。從事電腦業的馬先生促請林瑞麟盡快「滾蛋」，「冇做好佢份工，淨係聽阿爺講。佢一日唔落台，我哋會繼續行出嚟抗爭。」從事文職的黃小姐痛斥林「無恥」，企圖藉替補機制懲罰參加公投的選民。
晉升林瑞麟辣㷫中產
會計界歐先生痛斥特區政府晉升林瑞麟「辣㷫」中產，「知道佢做，我都好愕然，一定要出嚟。以後所有政制事務，佢更加唔使我哋同意就直接執行，對中產更加冇保障。」
他帶兩個女兒來遊行，希望下一代了解香港示威並不暴力，抗衡政府抹黑，「我哋好和平、叫口號，衝突只係因為政府官員冇回應。學劉德華話齋：咁嘅服務態度點得㗎？」
從事政策研究的80後巫堃泰穿上青天白日滿天紅上衣參加遊行。他慨嘆，特區政府背棄三民主義，尤其是民權，「林瑞麟剝奪我哋投票權，政府權力冇被制衡。家我哋需要和平革命。」
民陣指有三千人參加遊行。警方估計約二千人。新任政務司司長林瑞麟昨晚發表聲明回應，表示注意到社會上對他出任新職「有不同的意見」，他會虛心聽取各方面聲音、在新崗位盡心竭力。
林瑞麟八宗罪
強推替補惡法
余小姐：「替補機制佢（林瑞麟）之前死唔肯改，俾人嘈兩嘈又改，好似當香港人冇聽過佢之前講過乜！佢咁都過到骨，以後其他人都過到骨啦……林瑞麟做政務司香港淪陷㗎！」
胡仙案八萬五有份
李慧玲 商台節目主持：「林瑞麟擔任律政司政務專員時，胡仙案搞成咁佢都有份。（做）新聞統籌專員開始錄音機本色，八萬五、副局長……成績咁差都有得升，完全推翻香港人獅子山下精神。」
做人肉錄音機
梁先生：「一個錄音機都可以做政務司，真係接受唔到？佢民望低大家有目共睹，睇咁多年電視，真係唔覺佢做過乜，講埋一樣嘅嘢，做政務司咪依然係一部錄音機。」
政改不重新諮詢
黃之鋒 中學生：「舊年林瑞麟推政改方案臨尾急轉彎，竟然唔重新諮詢。當時有調查話七成溫和中產都唔贊成新方案，佢知道社會有爭議，趁民主黨支持，就繞過民意盡快通過。」
只聽中央指示
黃先生：「不論政制問題、替補機制，政府硬要推，佢（林瑞麟）都面皮幾尺厚唔聽人講……既然佢係主內弟兄，一人唔可以侍奉二主，你唔係要聽阿爺話，而係要聽吓民意！」
放棄自治睇阿爺
譚得志（快必）：回歸基督精神同盟成員
「我哋演出埃及記話劇，預言林瑞麟做政務司長，香港必定有十災，包括釋法之災。林瑞麟民望咁低都升官，反映政府淨係睇阿爺頭，放棄自治。」
阻礙人權發展
胡小姐：「佢做政制及內地事務局咁耐，人權法從來唔見佢有認真維護過，如果再由佢做政務司司長，可以預見，香港民主發展腳步，只會諸多掣肘，甚至寸步難行。」
副局政助計劃一團糟
黎恩灝 民陣召集人：
「成個副局長同政治助理計劃係林瑞麟設計出嚟，聲稱要擴大管治班子、做多啲政策推銷，結果呢班人無所事事，啲嘢都係常秘做晒。真係嘥緊納稅人錢嘅就係佢。」
