陳豪、高海寧同官恩娜噚日出席銅鑼灣崇光百貨舉行嘅花生騷，大會送上高爾夫球情侶用品畀正同陳茵媺蜜運嘅陳豪，陳豪好受落之餘，仲好識做咁話：「我都唔介意着情侶裝，覺得係件幾好嘅事。」
最近陳豪舊愛廖碧兒助手喺微博鬧陳豪唔係好人，陳豪話過去嘅事不作評論，佢話：「我係一個向前看嘅人，過去每個人都唔可以否定，但都係好嘅回憶。」另外，高海寧噚日示範瑜伽服時事業線暴現，令人眼前一亮。
廖碧兒未落腳
至於廖碧兒就噚日朝早同薛家燕、徐濠縈喺山頂出席香港乳癌基金會步行活動，講到近日電視挖角潮，問廖碧兒王維基有冇搵佢合作，廖碧兒就話：「若果啱嘅都會。」會唔會返娘家無綫幫手？佢話：「唔排除再有合作機會，我家冇簽任何電視台。」至於家燕姐就透露無綫已經同佢提早傾續約，佢笑笑口話：「人工加得OK，留喺TVB成數好高。」