國中控股（202）上兩星期連跌8日，單係上星期四就瀉咗六成，斬倉之說隨之而起。前日大股東張揚宣佈，悉售持股，咁隻殼落咗去邊個度？答案：金利豐（1031）行政總裁朱李月華（圖）。
華華聽聞，張揚今次被迫割愛，原因係欠落朱太錢，近排資金緊絀，冇辦法之下，惟有出讓公司控股權。張揚前日以每股0.27元出售10.33億股國中畀朱太，套現約2.8億。噚日國中大幅反彈64.8%，收0.445元，一日之間朱太賺咗1.8億。
主營污水處理嘅國中，旗下仲有隻上海A股黑龍江國中水務，噚日上晝喺上海跌近一成至中途停牌，睇怕都係同大股東國中易主有關。