滙豐自從行政總裁歐智華上場之後，先喺8月初宣佈全球削減3萬個職位，9月初再宣佈香港未來3年裁員3000。可能基於有路走梗係自己鬆人好過俾人郁嘅緣故，所以呢兩個月，滙豐中高層可以用「雞飛狗走」四個字形容。
黃慧群轉職瑞信
噚日又爆出滙豐金融服務（亞洲）行政總裁黃慧群劈炮，轉去瑞信做私人銀行，暫時唔知邊個接手佢個位。
自從歐智華金口一開，話要精簡架構後，數數手指，起身嘅中高層冇10個都有半打。首先，Mark哥馬凱博喺香港滙豐宣佈裁員3000人後冇耐走人。跟住差不多成為滙豐財富管理產品「代言人」嘅Bruno李錦榮又話走，咁啱兩個都係轉行做資產管理。
至於因退休而走嘅，就有保險業務主管湯德信，同埋交易銀行業務主管郭懷道（JohnCoverdale）。集團拉丁美洲及加勒比海行政總裁EmilsonAlonso早幾日都宣佈會退休。
仲有喺獅子行服務咗30年嘅北美滙豐行政總裁布克（NiallBooker）最近又話下個月走，連埋策略日之前已經宣佈退休嘅首位華人大班鄭海泉，同埋集團企業傳訊總監白永昌（RichardBeck），齊人開到兩枱麻雀咯！
有人辭官歸故里，有人漏夜趕科場。另一邊廂，恒生（011）噚日宣佈，滙豐香港新大班馮婉眉，同恒生總經理兼財資業務及投資服務主管馮孝忠入董事局。據華華所知，喺恒指成份股中，恒生董事局無論係女士人數，同所佔百分比都係最多嘅，唔知會唔會為恒生帶嚟更多新思維呢？
李華華
mailto:[email protected]