上個禮拜五，大摩出咗份報告，將瑞年國際（2010）連降兩級，搞到瑞年嘅股份俾人掟到唔清唔楚。瑞年主席王福才噚日現身香港，為公司大平反。佢話之前公司同大摩嘅關係都唔錯㗎，但大摩出報告前就冇搵過佢哋，公司都係投資者打嚟先知。
王福才仲話，事後有親自打電話去了解事件。對於大摩份報告，話喺購買模式疲軟之際，瑞年嘅銷量可能下降，王福才認為只係講佢哋嘅凉茶業務，並唔係話整體業務唔得。佢仲話，公司第三季生意按年升咗起碼四成，第四季定單接近兩億人仔，今年全年生意增長目標係30%至40%，並唔係報告預測會倒退。
王福才表明，「我只懂得做生意，市場運作的事我不懂，我也不懂甚麼叫拋空！」雖然王總高調反擊，但噚日瑞年只係彈咗7個巴仙。王總話，佢冇諗過要告邊個，亦相信同大摩再見亦是朋友。華華收到風，大摩分析員噚日都有去瑞年投資者會議，仲答應去瑞年今個禮拜尾搞嘅實地考察兩天團，應該有偈傾啩！