兩年一度嘅非洲國家盃決賽周，對唔少擁有非洲兵嘅英超領隊都係噩夢；事關決賽周由1月中打到2月尾，正值英超同本土盃賽如火如荼之際，麾下球員代表國家隊唔見人，影響都可大可小。不過經過上周六嘅外圍賽，又有尼日利亞同南非緣盡決賽周，唔單止英超領隊，連球員都開心晒，隨時想開香檳慶祝。
遭幾內亞逼和被踢出局
2012年非國盃決賽周由赤道幾內亞同加蓬兩國合辦，呢個星期六、日就踢埋最後一輪外圍賽；尼日利亞上周六主場對幾內亞，一度領先2:1，點知補時階段被幾內亞逼和2:2，B組屈居對手之後排第2，緣盡決賽周；「超霸鷹」86年後再度缺席決賽周，教練施亞施亞（SamsonSiasia）事後就公開向全國道歉。
同日另一支出線冇望嘅名牌球隊，就喺啱啱主辦完世界盃嘅南非，上周六主場賽和塞拉利昂，埃及就3:0大勝尼日爾，結果G組就有尼日爾、南非同塞拉利昂同分，計算3隊對賽之後，尼日爾戲劇性出線。
其實早前已經有喀麥隆、埃及等大國出局，今次又有超霸鷹，最開心嘅英超領隊莫過於車路士嘅波亞斯同西布朗嘅鶴臣，事關約翰米基爾同奧丹維治兩位尼國國腳，喺車仔同西布朗都孭重飛。尤其車路士，呢幾年非洲兵踢完國際賽都試過損手爛腳歸隊，艾辛代表加納試過斷腳，杜奧巴感染過瘧疾。而且非洲國家治安差就人所共知，約翰米基爾父親之前俾人綁架，米基爾使唔少錢先救番老父；多哥年幾前發生國腳被槍殺事件，熱刺前鋒艾迪巴約之後一直拒絕再為國效力，證明球員代表國家隊都係苦差。
雖然唔少傳統強隊出局，明年1月21日揭幕嘅決賽周都仲有唔少好戲碼，科特迪瓦、加納、塞內加爾、馬里等強國都叫做入咗圍，而利比亞上周六亦憑最佳次名出線，利比亞今年陷入內戰死傷慘重，希望戰爭唔好影響國家隊備戰之餘，球員保持上下一心，幫國民送上安慰啦！
