打開門口做生意，搵錢天經地義，但搵錢都可以搵得好有意義！好似大快活（052）咁，行政總裁陳志成話，正陸續喺全港分店增加無障礙設備，包括加闊餐廳主要通道同加設活動座椅，提供代點餐同送餐服務。噚日仲宣佈，夥拍附有輪椅起降設備嘅的士──「鑽的」，向「鑽的」客戶提供總值70萬元餐飲優惠券，畀殘障人士同屋企人出外用膳。
雖然擴闊通道會令餐廳擺少幾張枱，但嚟自餐飲業立法會議員張宇人話，由於人口老化，越嚟越多公公婆婆需要輪椅，食肆無障礙服務其實可以配合客戶需要，相信會有唔少食肆跟隨。
除咗關注殘障人士，自從最低工資推行後，個個寧願去做看更，搞到食肆搵唔到工人。大快活舊年開始，為師奶學生哥提供兼職機會，陳志成話，師奶要湊細路返學又要買餸，所以推出中午4小時兼職職位，日賺120蚊，深受師奶歡迎。至今呢類職位已經超過千二個，佔整體僱員三分一。