本來真係唔想寫SteveJobs，但見坊間一眾忽然入教之徒是但亂噏，濫情之餘兼教壞細路，周日早上提早開工，坐喺Classified邊食EggBenedict邊奮筆疾書。人人想解剖教主澎湃創意來源，話佢結合人文科學同現代科技文明，化繁為簡，革新科技同生活關係。本地傳媒多是食外電水尾，人云亦云，提到佢70年代赴印度學佛，對佢思想有影響，但有乜嘢影響就冇人講得出。
真正影響教主創新精神，並非印度佛教，而係中國本土化佛教禪宗，戰後在歐美由日本禪師鈴木大拙，及越南一行禪師發揚光大。教主80年代開始，在PaloAlto禪修中心跟隨一位日本禪修大師乙川弘文學習，呢位大師早被視為蘋果精神導師，今年《Forbes》正準備出版一本叫《TheZenofSteveJobs》嘅漫畫（圖），內容係講兩人嘅關係，未知推出市場未，但在網上有幾頁樣辦睇。禪宗其實唔係宗教，亦非香港喃嘸阿呢陀佛，燒香拜神捐香油起大佛呢種。禪宗係通過修習，整理思緒，專注直指本心，成為一個自覺嘅人。禪宗由此衍生出一種獨特美學觀念，以少為多，追求越簡單造型越永恒。
禪宗觀念應用科技產品中
教主代表作iPod，本來只係一個Harddrive，設計就型到爆，尤其係個圓形ClickWheel。凡參加過禪修都知，歐美傳習之中有「行禪」，一邊行心裏數住步伐專注自己呼吸，會慢慢進入渾然忘我之境界。行禪時，多是圍住個圈行，ClickWheel之圓圈同教主修習行禪有關。教主將禪宗「空」的觀念，應用在科技產品設計之中，打敗了Sony。Sony前CEO出井伸之苦思設計一個包含所有功能嘅終極產品，稱霸互聯網時代，但往往方法係不斷將功能加入產品之中，功能越多瓣瓣有但冇一樣最勁。教主iPhone會成為終極產品係「空」，任何人放Apps上去，將功能伸延。
中國今日以仿冒作設計之源，山寨iPhone功能比原版還要多，強國出品的hiphone早就有甚麼雙卡雙待，中國絕對有先進生產技術，但中國人欠缺係靈魂、係文化、係美學。
冇文化復興，中國絕不會有世界級創意大師出現。向SteveJobs學習？中國人連學乜都未知。
添馬男