蛋黃公司嘅「小蚊」一直好得公司器重，皆因佢辦事能力強，一向事業心重嘅佢，上年突然話要去外國讀書，呢個決定令好多人都覺得奇怪，走得咁突然，查實因為佢同內地一個已婚富豪有咗愛情結晶，個肚一日比一日大，真係唔走唔得；所以小蚊只好同老闆請假，到今年初生咗之後，佢先至回歸香港。呢個富豪對小蚊都唔錯，雖然唔係生個慈姑椗，只係添咗個囡囡，但富豪一樣喺香港買咗間成二千萬嘅豪宅畀小蚊，雖然富豪絕對唔會同正室離婚娶小蚊，但對小蚊都算係咁啦，樣樣照顧周到！小蚊雖然明知自己係二奶，但佢家有女萬事足，做嘢都唔似以前咁搏。
撰文：關仁