蔡東豪上星期介紹BradGilbert本大作《WinningUgly》，講解「啱啱夠贏」道理。我睇完有啲擔心，因為本地精英睇報紙淨係睇標題，望文生義，未睇內文已懶醒以為自己知道晒，如果振英及幕後肥瘦二煞睇完標題，好可能誤以為靠抹黑醜聞就實踐了WinningUgly戰略，足以打垮唐唐，最後結果係完全錯晒！
我早講過今次係行政長官選拔，唔係選舉，定性搞錯會死得人，而負面宣傳係七傷拳，對手公眾形象受損民調失分，仍有得救，但放毒者被阿爺視之為奸邪小人就仲大鑊。難怪周日振英哥誓神劈願，唔認自己陣營放毒，但公信力大報死咬袁莎莉緋聞唔放，而大報挺梁立場人人都知，肥瘦二煞又口多唔收，呢筆賬算到振英頭上自然不過。
放毒要有策略
梁營想將私事緋聞引向公事，指控唐唐為官期間品格審查有問題，毒就夠毒，但只怕毒得滯，振英哥自己先死。負面宣傳呢家嘢唔係亂玩，放毒要有策略兼唔好留低指紋，阿爺難以追查。一個二個諗住一旦唐唐捱唔住就一擁而上執死雞，你話阿爺點會信呢班機關算盡之徒，點會仲要扶佢哋坐正。范太再變多幾次空手道都冇用，淨係呢個月表現已經令人心寒而被踢咗出局。
WinningUgly精神唔係出茅招打蠱惑波，而係用策略補短取長，以上駟對中駟、中駟對下駟而勝出，但一樣要出真功夫。曼聯費爵爺同車仔教頭波亞斯閒談，大家對史篤城呢隊波好有興趣，因為史篤城正係WinningUgly戰略忠實執行者，史篤城典型入波方式係，大力神戴立掟界外球入禁區，幾條高佬一齊去湧，亂軍中抽射再省中對方守衞入網，當然唔似曼聯蘭尼單擋朗尼互傳再射入世界波咁高欣賞價值，但就絕非蠱惑茅波，而係戰術部署。
振英要創造奇蹟，就要明白真正WinningUgly精神。
添馬男