10月15日，全球佔領華爾街，香港有唔少社運人士響應，打算喺當日進佔中環交易廣場平台，佔領廣場上隻牛，反對金權體制。噚日反林D9大遊行過後，十幾個戴住V煞面具嘅示威者踏上講台，一字排開，昂首但不語，播出錄音聲帶呼籲大家喺本周六下午兩點齊齊去佔領交易廣場。佢哋話當日活動係冇組織、有領袖，人人自己代表自己，目標係要向金權制度抗議。仲話以美國為例，1%嘅人佔據咗99%嘅財富，大家要從呢1%人手上，奪回大眾應享有嘅經濟成果咁話。
社民連副主席吳文遠話，佢哋會聲援呢個活動。左翼21都話會舉辦一個半佔領、半論壇嘅活動。佔領交易廣場嘅其中一位發起人係社運人士楊匡，可惜佢家陣身在內地，腳又受傷，加上內地上網唔穩定，未能夠加緊動員。楊匡就喺內地吹雞，話希望大家喺本周六做馬拉松式佔領，喺交易廣場嘅平台集會，齊齊唔走，一直留守到下周一。楊匡解釋，要一連三日做佔領行動，係希望多啲中環上班族周一返工時會睇到佢哋嘅行動，了解吓佢哋有乜嘢訊息想表達。佢話星期六、日冇白領返工，如果行動草草結束，就冇乜意思。