繼「天價酒」事件後，中石化又搞出「天價卡片」事件。內地傳媒引述一位自稱係中石化地方分公司中層人員爆料，話中石化河北分公司兩名宣傳部負責人，專程去北京一家知名連鎖店，用13萬人仔印咗500幾盒卡片，每盒天價260蚊。
中石化後來出嚟解畫，話天價卡片嚟自旗下齊魯公司，費用包括試印同郵費，其實一盒卡片只係96蚊人仔。
不過，96蚊都唔平，根據香港卡片王網上價目，雙面彩色白卡片100蚊港紙已經有300張。
喺大陸印仲平，根據廣州炫彩印刷價目表，同樣嘅雙面卡片，一盒只係16蚊人仔，仲未計印得多有得平。難怪有網友問：「甚麼名片能值260元一盒？」