本欄上周四推介永暉焦煤（1733）博反彈，半晝已完成目標，1成回報袋袋平安。熊市博反彈切忌大貪，有得賺已要還神，否則再被綁死，隨時有排返唔到家鄉。
反彈進入第二日，濠賭及建材股等普遍已炒高3成以上，再追入值博率低，反而有啲高位暴瀉9成嘅股仔，開始蠢蠢欲動，不妨留意吓中國智能交通（1900）。此股由去年底5.92元開始下插，上周四低見0.61元，跌足89.7%！
今年股價跳水，主要歸咎兩個原因：中央擔心經濟過熱，決定減少高鐵投資，以及近月動車意外頻生。不過，公司仍有接單，跌9成係咪過份咗啲？上半年純利7468萬人仔，增長60.5%，每股盈利5分。即使全年盈利倒退5成，預測PE只係6倍，以概念及行業獨特性而言，都係非常吸引。
個價殘成咁，以反彈黃金比率0.382倍計，智能交通股價可見2.60元，潛在升幅2.6倍！即使以20天線1.08元計，水位都有48%，相當可觀矣。圖表上，股價上周五急升14%，收報0.73元，技術走勢而言，RSI有見底回升迹象，MACD亦將再現牛差距，可小注一博，跌穿0.65元止蝕。
魏力