聯合地產（056）的租賃物業，件件筍嘢，但對上星期股價已經挨近海嘯價浮沉，抵撈。聯地喺香港主要酒店及投資物業，包括告東聯合鹿島大廈、灣仔中國網絡中心及世紀香港酒店，重秤唔在講，呢類物業就算喺海嘯時期咁差嘅日子，一年都為聯地貢獻收入過2.5億銀，為集團帶嚟穩定現金收入。至於聯地的物業發展，就透過天安（028）主攻內房。後邊天安手頭土儲過6000萬平方呎，最新淨借款比率3%都唔夠，又理得你家陣外邊打10號風球，穩陣到爆，中長線兼且可以為聯地提供豐厚利潤，NAV有大躍升潛力。呢轉住聯地低位0.82元，股價跌到落呢個水位，唔怕撈，擺中線，博翻半番到1.23元，聯地都未有耐上到家陣NAV2.7元水位。
中旅價殘可翻一番
中旅（308）對上星期質穿1蚊，又係跌到落海嘯價。照咁睇，中旅手頭淨現金高達22億銀，係超級現金牛之餘，集團中、港、澳酒店，又係件件噹噹聲，有咁嘅質地，都俾沽家質到阿媽唔認得，離晒譜。但咁仲好，俾買家筍價入貨機會。7月頭寫中旅目標價2.1元無變，現價中線潛在回報率，係博一個Double。
錢雋