馬瑟韋爾中場真寧斯懷疑非法賭波單嘢，本來冇人會理，但係件事牽涉到朗尼老竇（老朗尼）同埋朗尼阿叔列治，就好難唔小事化大。兩位老人家日前被捕獲保釋後例牌否認，至於英超賽會建議各大博彩公司以後唔好再開古靈精怪盤口，你話得就得咩！
老竇被捕朗尼心情唔靚
48歲嘅老朗尼同埋佢細佬列治前日喺利物浦居所被捕，兩人嘅電腦一齊被帶走，不過，佢兩個好快就獲釋，事後，代表佢同列治嘅律師發表聲明，當然否認有參與非法賭波，仲話會全力協助調查，其他嘢暫時無可奉告喎。9個被捕人士將會喺出年一月接受聆訊。呢次非法賭波牽涉星級戰將嘅親人，令英超聯會大為緊張，建議各博彩公司日後唔好再開五花八門嘅賭盤，好似第一個角球、第一個領黃牌球員等等喎。不過咁做未免逆潮流兼阻人發達，博彩公司點會因為咁而斷自己米路。
件事本來同朗尼無關，據講呢位曼聯球星直到前日隨英格蘭大軍抵達黑山後，至收到老竇同阿叔被捕嘅消息。雖然英格蘭領隊卡比路已表明唔會因呢為今次事件棄用朗尼，但朗尼心情唔多唔少受影響。
另一個近日心情受影響嘅球員，當然係已被冠以「冬甩王子」外號嘅曼聯門將迪基亞，不過呢個西班牙人都幾豁達，衰咗之後勇於正視件事。
豁達迪基亞訪問食冬甩
好似日前西班牙電視台訪問佢嘅時候，訪問嗰位仁兄帶埋冬甩，擺明想令迪基亞難堪，但迪基亞冇尷尬不特止，仲說時遲那時快，一手拎起個冬甩咬一啖，然後仲同國家隊隊友蒙尼恩分甘同味。佢唔尷尬就冇嘢好玩，呢一招都算幾高章，唔知係出自曼聯嘅智囊，抑或係西班牙國家隊嘅人教路呢？
