上星期一場風，唔少人乘機留喺屋企竹戰！仲玩朝行晚拆麻雀枱？學《嚦咕嚦咕新年財》應采兒話齋：「畀啲大志啦！」上行最勁架生，玩得Pro都有Face。
記者：朱崇德
攝影：林栢鈞、陳盛臣、蔡家輝
Model：Kitj、Rika、Betrys、Hailay
LED大包圍賭神燈
麻雀枱燈真係盞盞都要高高掛？未必！我喺G.O.D遇上呢盞「高清LED麻雀燈」就十分盞鬼，頂部一支散彈式高掛射燈，主要方便俾你睇清枱面，而佢最出色之處係有個四方燈框，放喺枱面圍邊，四條長條形LED燈光向內散射，將手頭副牌打到晶瑩剔透如曉發光一樣，好有《賭神》Feel！再講，由於行LED關係，打牌時完全唔覺熱，絕對係大包圍式麻雀燈嘅另一境界！四方燈框仲係伸縮式設計，可調校不同長度，配合不同大細枱形。
麻雀燈 要擺兩呎位！
燈飾專家曼佳美話麻雀燈Set喺兩至三呎高，應可做到全枱面照明效果；當雀友坐定定平視時，如果望到燈膽頭，就代表Set得過高，易令人眼澀疲累。好似曼佳美呢款「VIVIO雙臂工作燈」，佢最強之處係燈罩位特長，唔易外露燈膽位，燈罩內部呈鑽石形，散射效果特別柔和，一般以5W-8W慳電膽或LED膽作配搭即可。
自動洗牌靜音打通宵
好多人都覺得自動洗牌麻雀機會令打牌成件事無晒手感，少好多樂趣。但不講不知，由於洗牌動作收藏於機內，洗牌時變得靜好多，打到三更半夜都唔怕俾隔籬投訴。咪睇呢部「麻雀工房」價錢比較貴，如果用過大陸貨，相信都遇過用唔夠幾個月就出現種種小毛病，正所謂一分錢一分貨，想玩得盡興，都係幫趁正版靚貨啦！
麻雀布墊有枱開局
相信唔係人人屋企都放得落一整張麻雀枱，唔緊要！呢張布墊可以幫到手，基本上可以當佢係一塊枱布，不過東南西北位有條特厚圍邊，可以協助你整理麻雀，又唔會咁易跌落地，最重要係布墊附海綿隔音墊，打起牌上嚟一樣好寧靜。
最強麻雀椅包無頸痛
咪睇小一張椅！佢絕對有能力影響你只係打到八圈定係通宵三十二圈！如果你佔主場之利，建議你買張最強嘅IOOOfficeChair，雖然佢本身係電腦椅設計，但係做足人體工學計算，不論頸枕、手枕、椅背等，通通可自由調校高度、角度，令成張椅完全切合你嘅體形；3D彈性腰枕托住條腰，坐耐一耐都唔怕腰骨痛。坐後感，我只可以講佢將你成個身體包住！對成日「瞓厲頸」人士最啱，打完三十二圈都唔怕頸痛。
a.G.O.D（28905555）
b.曼佳美（24923682）
c.螢燈駅（23972833）
d.JCSHOP（31022783）