曾先後效力商台、港台同新城嘅DJ陳海琪，01年9月離開港台之後，佢喺08年投資網上電台「omlive.com」，可惜唔夠半年就結業收場，呢幾年海琪就好似完全消失一樣。原來，退隱多年嘅海琪近日獲大班鄭經翰力邀加盟旗下嘅DBC香港數碼電台，今晚9點至12點，海琪就會喺大戲台開咪主持《海琪的天空》。
洪朝豐教縮骨
噚日馮仁昭打電話畀海琪，講到出山問題，海琪笑笑口話：「我未收過山呀！其實現時都係試播階段，遲啲會調去另一啲時段。」雖然海琪做DJ多年，廣播經驗豐富，但佢話家係數碼廣播，玩高科技，所以佢都要從頭學習：「我要極速學電腦剪帶同埋學個控制台，家好高科技，我心情就好似一個15歲學生返學咁。」究竟再次開咪心情又緊唔緊張？海琪話：「好戰戰兢兢，環境好陌生，但覺得呢度啲人好有活力。」
至於另一位幫大班開咪嘅洪朝豐，佢近期做節目之餘仲開班授徒，教人做DJ。噚日DBC將佢同學生上堂嘅相放上facebook，見洪朝豐縮起個膊頭教學生發聲運氣，但睇落就好似玩緊縮骨功囉。