法國品牌FOCAL最高級別之一嘅ScalaUtopia，專為中港台推出一款限量版，保留霸氣外形之餘，更結合如林寶堅尼般的金屬橙色焗漆，可算霸氣橫溢。粗中有細，震動膜用上貴價金屬鈹，高音更清更準，令ScalaUtopia霸氣中顯溫柔。全球限量僅30對，26萬身價算物有所值了。
記者：陳國輝
攝影：陳盛臣Model：Fiona@Zmodel
限量金屬橙焗漆
見過唔少聲稱Crossover名牌跑車嘅AV影音，但點先算珍貴？可能無乜準則，但在室內環境下，驟眼睇ScalaUtopia只不過塗咗一層金屬橙色，然而當射燈直打，你會發現佢表面仲有一層金粉以及拋光效果，閃令令，質感如同跑車外殼。但唔講唔知，其實音箱表面已經過三十幾次人手打磨然後再噴漆，難怪表面光滑如鏡，簡直係百分百法國人嘅手工藝品。
今次FOCAL並非首度推出ScalaUtopia，但咪以為限量版得個朵就算！請轉身往後面睇，喇叭中間有Mr.GerardChretien親筆簽名，佢除咗係Utopia系列總設計師，仲係世界級調音大師，惟獨特別版經佢親手調校過，音色表現方面，肯定跟普通版係兩回事。
全HandMade兩個月做一對
除咗音箱經全人手打造，其實ScalaUtopia的1吋高音震動膜，亦採用一種叫鈹（Beryllium）嘅貴金屬材料製造，質輕兼硬度夠高，屬世上最好既高音振膜材料。簡單來講，優點係播高音嗰陣頻寬好闊，而且容易推，亦即係話高頻還原度極高；此外，呢對喇叭亦配備6.5吋和11吋嘅三文治中音及低音單元，也同樣在法國以人手製造，所以音響專家阿Ken話，每完成一對ScalaUtopia，就要花上兩個月時間。
至於音色表現，ScalaUtopia走大路風格，易入屋為主；阿Ken話，因為呢款喇叭採用假想共軸設計，只要你坐正等邊三角嘅「皇帝位」，便感受到高、中、低音嘅細緻平衡，唔會出現部份大聲、部份細聲嘅奇怪現象。此外，喇叭底部仲有Jumper給發燒友自行調高或調低音頻，可慢慢Tune出自我Style。
Ken推介試聲天碟
《LaBamba》
呢張碟最大特色係全部用金屬樂器演奏，除可感受強烈金屬感外，還可體驗到ScalaUtopia音箱的澎湃氣勢。
《TheTBMSounds!》
由日本唔同樂隊製作嘅Jazz專輯，以人聲和鋼琴演奏為主，感覺輕柔舒服，可體驗出喇叭柔和演繹嘅一面。
《竹竹》
呢張專輯屬原裝美版，不論高、中、低音域，甚至打鼓部份，幾乎全部以竹來發聲，很有南美和日本嘅風情。
《誰是陳奐仁》
呢期紅透全港，並經常喺音樂比賽中任評判嘅陳奐仁，呢張專輯濃縮咗佢十年嘅成果，阿Ken極力推薦。
《TheSheffiedLab:Drum&TracksDisc》
黑膠LP年代，已屬發燒友試器材天碟，最大特色係有超凡樂器質感，以及逼真音場空間。
《DynamicPiano》
一張好Classic的純鋼琴專輯，除給喜歡Piano的朋友慢慢細味，內容也偏向Dynamic風格，鍾意熱情澎湃的話，啱晒！
查詢：昇和影音（23140811）
同場加映：KEFR系列總動員
早前，Blade以全白色彎刀造型登場，視覺上夠晒震撼！而今次KEF再推出Reference系列，更總動員提供座地喇叭、書架喇叭以及超低音等成套架生，組合成5.1放在大廳自製家庭影院嘅話，效果仲正。
當中最高規格嘅R900，佢同Blade一樣採用開孔式導管高音單元，更內置Z-Flex環繞聲懸邊，可減低音頻擴散時嘅干擾，音色平滑自然，高頻更加甜。至於R700就採用直徑較細嘅6.5吋低音單元，同時也提供1吋高音以及5吋中音單元，亦玩上座地式設計；但如果想細啲，則可選擇書架形嘅R300，佢提供一個高、中、低音單元，最大分別係體積縮細約三分二，擺書房就啱晒啦！
查詢：GPAcoustics（24108188）