話說早前唐英年辭去政務司司長當日，現場傳媒異口同聲話係意料中事，全無緊張氣氛。可能係咁，有行家反而有時間留意到唐先生改坐了另一台Volkswagen的靚車。查實點止係靚車咁簡單，Phaeton是福士的頂級豪華座駕，好多政府首長人員都選用，就知係身份象徵。
記者：蕭漢祥
攝影：黃子偉、林栢鈞、劉永發
Model：梓菕
唐唐的座駕Phaeton屬Volkswagen的頂級型號。
VW旗艦豪華車
這次前政務司司長喚起大家對福士Phaeton的記憶，皆因他乘坐那部已經是上一代型號，外形始終唔夠Update同型仔，數月前推出的2011版本Phaeton，相信更加迎合豪華房車潮流。今次的旗艦版Phaeton，由鬼面罩到車尾的設計，完全繼承了VW血統，從車頭睇有可能認唔出係Phaeton定Passat，不過車尾一個簡約的名牌，加上車身大量的電鍍飾邊，完全凸顯出車系中的超然地位。至於內櫳，更加係新車的重要一環，因為它是老闆們的休息室、會議室，甚至是睡房，所以佈局比上一代更豪華，中控台及車門均用上大量人手製作的木紋飾板，富麗堂皇的氣派表露無遺。
這部近百萬身價的名車，採用了3.6公升V6引擎，符合歐盟五型的排氣標準，最大馬力及扭力為280匹及370Nm，動力的輸出剛好配合行政座駕的需要。只可惜這部豪華房車不能隨便揸出來讓傳媒試駕，否則就可以進一步感受一下強勁輸出與舒適內櫳的矛盾感覺。
指大電視任揀車
去年，VW創先利用iPad作為銷售工具，推銷員好型咁手持iPad，一邊睇車一邊用平板電腦將新車的車身顏色、規格及有關資訊一併Show畀顧客睇。而今年VW將有關技術再搞大啲，點大法？一於放到成部電視咁大，今年4月開幕的九龍灣Showroom，剛剛加裝三部輕觸式特大電視屏幕，每部分別連接電腦系統，想睇邊架車只要按幾按就可以顯示。還有更有趣的玩法，就是Showroom內擺放了多款VW旗下的汽車模型，只要將模型放上屏幕下的感應器，屏幕就會顯示出跟模型車一模一樣的型號，用小車揀大車的概念的確有趣。
貴賓房猶如豪宅
另外，買得價值約百萬元Phaeton的客人，當然係非富則貴、有頭有面，有可能不太喜歡在其他客人面前左揀右揀，喜歡多一點私人空間。所以早前推出Phaeton的時候，一併推出VIP貴賓房間，讓客人可以在私隱度較高的地方慢慢揀。雖然廠方無公佈耗資多少，但房內影音設備齊全，備有65吋高清大電視及可以透過藍芽連接iPad上網，讓兩個屏幕同步顯示，再加上房內鋪上柚木地板、高級梳化及酒吧，簡直猶如一間豪宅。
Phaeton3.6
引擎：3,597ccV6
馬力：280PS/6,250rpm
扭力：370Nm/3,500rpm
傳動：6速自動連+/-
售價：$960,000
查詢：36989888（VolkswagenHK）
