唱得扮嘢又得的李龍基前晚開騷，風騷的他更不避嫌錫錫女fans。當晚李龍基笑言佳視和麗的曾找他唱三首劇集主題曲，誰知他唱完後就執笠，幸好無綫沒叫他唱三首，否則後果堪虞。
李龍基前晚在文化中心舉行一場「基會難逢金曲35周年演唱會」，吸引不少忠實fans捧場，當中他請來不少無綫幕後老友到來睇騷。當晚李龍基唱出不少電視劇經典金曲，他笑說：「當年佳視同麗的我都分別幫佢哋唱咗三首電視劇主題曲，點知唱完佢哋就執笠，TVB有慧眼，唔好要我唱三首，否則有危機。」
風騷錫錫女Fans
當晚李龍基請來鄭國江睇騷，他透露鄭國江二千多首作品中，自己佔30多首，其中最為人熟悉的是《男子漢》，不過李龍基說：「但係我唱咗咁耐，我都係早幾個月先知呢首歌係由鄭老師寫，因為我平時唱歌好少留意係邊個寫。以前啲歌可以普及至非洲，但家嗰啲只可以去到長洲同落馬洲。」有女fans向李龍基送上鮮花、禮物和利是，風騷的他不避嫌錫女fans的手及面。
「黑妹」李麗霞當晚做表演嘉賓，她出場時現場播出香港小姐的音樂，李龍基形容：「佢嘅三圍有49、27、52，好少人有咁嘅身材。」李麗霞聞言笑說：「咪成個水桶咁，你個舊partner（指朱咪咪）都係胸前有咁低得咁低。」李龍基則笑言：「佢再低都冇嘢睇，你有料啲。」
「TVB對我好好」
完騷後李龍基在後台接受訪問，提到無綫台前幕後被挖角，他坦言以前都被人挖過，但未有答應，李龍基說：「我都enjoy家嘅工作模式，間中做騷登台，嚟緊我又去美加。其實簽電視台都要睇條件，我享受家自由自在感覺，TVB對我都好好，係另一種快樂。」
採訪：馬建華
攝影：仇志德
