原定於上個禮拜四舉行嘅「nowSports香港足球頻道開台儀式」，因為8號波納沙襲港，延至噚日先舉行；9支港甲代表悉數出席，而無參與嘅晨曦都有個着住波衫嘅假公仔在場。至於剛喺高雄舉行嘅龍騰盃，now雖然冇直播，但噚日都有邀請衞冕嘅港隊（圖），搞咗個祝捷會慶功。nowSports頻道副總裁賴汝正席後透露，港甲頻道收視理想，之後考慮每月由體記同評述員選出MVP，增加吸引力︰「收視真係比預期好，甚至拍得住一啲歐洲波。」因應足總要求，nowTV仲特別破例畀客戶以最低35蚊單買一條港甲頻道益街坊！